學聯秘書長周永康Alex呢位「被時代選中嘅年輕人」，因為一場佔領運動，個幾月嚟以雨傘廣場為家，開會、落區、接受訪問，日日都忙得不可開交。
佢噚日亦一早應承咗兩點半去到九龍塘港台，接受政壇元老李鵬飛訪問，相信都係講吓上京之行，大批傳媒都在場守候，但佢最終直至3點半先現身，遲咗一個鐘到底搞乜東東？原來佢車輪式接受傳媒訪問，講吓講吓發現過咗鐘。
飛哥雖然都喺嗰度乾等成個幾鐘，但佢一見到Alex都冇怪責，反而送上關心同問候，話佢面色唔錯喎，係咪休息得好夠？Alex笑笑口話，面色好係因為港台幫佢化咗妝，相信女粉絲一樣咁like上咗妝嘅康康。