人稱「燦神」的廖偉雄，明年將重出江湖在九展舉行演笑會，以經典造型「乜太」亮相。燦神在節目《亂噏24》透露，因為他太愛演藝事業，才選擇在高峯期轉行從商，領悟一些新事物，豐富人生。其間主持陳淑莊（Tanya）被燦神的演藝熱誠打動，當眾流淚。節目足本版逢周四晚上11時播出，讀者可在http://bit.ly/appletalk24重溫。
撰文：馮國康
人稱「燦神」的廖偉雄，淡出娛圈多年但人氣不減，全因他的扮嘢絕活至今無人能及。而眾多角色之中，又以《笑星救地球》的「乜太」最為人熟識。明年燦神舉行演笑會，起初打算以乜太做主打，惜無綫因版權問題禁制，乜太被迫改名七太。
原來Tanya當年做舞台劇時都扮過乜太，起初還十個不願意，她笑說：「有個環節教煮餸，即刻諗起乜太，我話好難扮喎。後來我試衫，忍唔住喺鏡面前扮，個個喺度笑。之後我明，其實我係似乜太，我認囉！」徐緣問燦神當初乜太是誰創作出來，他說：「黎文卓度嘅。我哋只不過係演員，只不過係演繹啫。同黎文卓合作有度好，因為佢啲劇本比較遲，所以任你發揮。」那乜太造型可有參考別人，譬如方太？燦神耍手擰頭：「冇冇冇。」《笑星救地球》還有一個環節叫「九七前後」，以回歸前後港人的用語及生活模式作對比。想不到當年節目竟預示了今日香港實況。燦神謙虛的說：「唔係預示，我哋邊有咁長遠眼光，只係搞笑啫。」
毅然從商蝕到空虛
燦神在演藝事業高峯時，突然轉行從商，Tanya問他如何放棄自己醉心的演藝事業？燦神說：「我可以日日做電視，但吸收唔到出面新知識。有日我諗如果再係咁，我會得到啲乜？我成就啲乜？我要呢份工養活我？定係呢份工可以令我發揮長處？」他想到如果做生意能養活家人，自己就可以實踐理想。「藝術係嚟自生活，你一定要將生活反映出來，呢個先叫藝術。」於是燦神毅然從商，縱使碰釘無數，但至今無悔，他笑說：「點知做生意風險咁緊要，蝕到空虛！」
燦神認為生意失敗也是人生歷練，對演藝事業有幫助：「呢啲其實係你嘅data，到返番去演戲，你會發現可以增強角色，呢啲係演員最需要嘅嘢。」Tanya被燦神的演藝熱誠打動，一時間感觸落淚，卻反過來弄喊燦神：「你搞到我都落晒眼水，有冇紙巾呀？」燦神眼濕濕的說：「好多人問我一個問題，你以前咁好，𠵱家就咁咁咁，我一路同佢哋講，我都冇得過，又邊度有失過？」他又以金句警醒時下年輕人︰「𠵱家好多人話唔鍾意做呢樣、唔鍾意做嗰樣，其實可唔可以換轉個思維去諗？當你做一件事嘅時候，你去鍾意佢啦！當你鍾意一件事，一定會願意為佢付出。」
「藝術係最後嗰啖氣」
燦神現於內地發展有機農業，而且有聲有色，徐緣好奇問他到底之前懂不懂，燦神答：「我樣樣嘢都唔識！冇人一出嚟就識嘢，唔識咪去學囉！」Tanya覺得燦神人生飄忽不定，燦神解釋︰「其實人生係一個學習過程，到死嗰日都係學習緊，你永遠識唔晒啲嘢。」
究竟甚麼叫藝術？人人看法不同，但燦神對藝術有獨到見解︰「你臨摹王羲之嘅字，我又臨摹王羲之嘅字，大家基本技術係冇分別，因為可以練出嚟。但係藝術呢，就係最後嗰啖氣！」說法看似很抽象，但Tanya一點便明︰「其實係你自己，亦即係個人修養，可唔可以喺作品度反射出嚟！」
燦神霸氣回歸！唔怕打壓不笑無歸！
http://bit.ly/talk246501
教煮餸變暴力清場 只因方丈好小器？
http://bit.ly/talk246502
明星紅咗只顧打牌 所以回晒塘？
http://bit.ly/talk246503
97後香港變晒樣 佢一早估到晒！
http://bit.ly/talk246504
跟稿讀文化 高官睇電視學返嚟？
http://bit.ly/talk246505
燦神哭了！「怨於事無補，要去愛上它」
http://bit.ly/talk246506
惡搞祖宗講藝術 燦神︰「要有一啖氣」
http://bit.ly/talk246507
大起大落唔大鑊 人生最緊要肯學
http://bit.ly/talk246508
燦神領略食物奧秘 生嚿叉燒好過生乜太？
http://bit.ly/talk246509
風濕就要打支針？醫生，唔打針得唔得？
http://bit.ly/talk246510