周日賽事共有七位騎師因傷或停賽缺陣，形成眾人偶像莫雷拉更加隻手遮天，禮拜日惡馬如雲，其中三駒「紫電明珠」、「酣睡密碼」及「共創美夢」都係新座騎，因原有騎師缺陣而流入佢嘅手中，試問呢位手風已經順番嘅機會主義者，又點會唔乘機贏得盡贏吖！
先講頭場「紫電明珠」上仗由潘頓跑第二，今鋪因潘頓停賽，呂健威搵雷神接手，騎練今季合作之「連冠勇將」及「執子之手」全勝，「紫電明珠」睇配搭係時候開齋。至於第六場「酣睡密碼」被喻為苗廐最強新星之一，上次初出因雷神分身乏術而起用薛寶力，結果影相輸少少做阿二，今次適逢薛寶力因傷倦勤，雷神順勢攞番嚟騎，並且喺晨課親自仄準，禮拜日要喺三班開齋冇乜困難。而尾場「共創美夢」上鋪由羅理雅贏三班千六，姿態鬼咁輕鬆，呢場跑高一班惟路程冇變，摩廐上次日賽贏到開巷，反映新一輪攻勢全面開動，雷神前仗騎過此駒跑第三，能夠重新接手仲唔把握機會威番次咩！