田少俾中央搣柴，嚇到保皇黨鼻哥窿都冇肉，但成日鬧爆狼英嘅工業界林大輝喺田少被整治後，上周仍然喺立法會向狼「進諫」，鬧爆狼英歧視14K同體育界對經濟零貢獻嘅言論，曾鈺成即時提點問佢係咪政協委員。
噚日大輝喺立法會討論特權法查狼收巨款一事時，趁機回覆曾鈺成，話自己雖然做咗兩屆全國政協，但都希望做多兩屆，發言時一定會記住自己嘅政協委員身份。講講吓，大輝突然叫曾鈺成做「特首」，莫非佢收到中南海換特首消息？大輝「叫錯」職銜後，笑笑口話自己衝口而出講咗真心話，不忘叫番句「主席」，以免俾人話佢若有所指。似乎唔叫狼英下台，仲有好多曲線倒梁嘅方法㗎喎！最終大輝投票反對用特權法查狼振英，原來佢真係有記住自己嘅政協委員身份喎！