沙田師奶H去年做咗外祖母（阿婆），今年做埋祖母（阿嫲），欣慰歡喜之餘，生活方式有咗大轉變，女兒新抱早上返工，外孫女與孫女就準時由菲傭送到師奶H門口，孫女得幾個月大，只識瞓覺與食奶，外孫女已有十幾個月大，精力充沛到極，玩極都唔攰，師奶H就引佢上床瞓覺，搞到自己瞓着咗，外孫女還是在床上動作不停，於是師奶H的退休生活就是環繞着孫女旋轉，話辛苦過以前到中環返工。星期日將兩孫女交還俾佢地父母，到馬場反覺輕鬆，有一次碰到活力十足嘅阿婆兼阿嫲M女士，M女士話：「哎吔，你唔好呻呀，我啲親家同我爭住要湊孫仔孫女，卒之大家達成協議，有一個時間表，孫仔與外孫女要輪流睇，阿仔嘅外母與阿女嘅奶奶唔想我踩過界㗎！」
古語云老來從子，現代人係老來從孫，退休K教授嘅千金派駐北京嗰陣，K教授夫婦一收到北京來電，就會即刻笑瞇瞇咁飛上北京，因為千金要去紐約公幹，請佢兩位上京湊孫也。退休高官M有一輪去咗多倫多，原來又係接到女兒柯打，飛過去陪孫女。高官S話：「你估一定有得玩孫湊孫㗎，有一次我地去到，原來親家亦飛咗過去，阿女嘅奶奶幾乎坦白到叫我地返香港，唔好阻生晒，個孫女由佢睇住得嘞喎！」
記得以前湊仔湊女，玩具簡單，洋娃娃、Lego、公仔紙就可以玩一日，但現在師奶H嘅外孫女開口埋口就講iPad、iPhone，睇電視卡通台，睇過一次Frozen影碟，呢排每日都向阿婆講Frozen，呢啲電子玩意睇得多又驚住影響眼睛與影響他日嘅讀書興趣，不能俾小孫睇得過量嘅，但唔俾嘅話，佢又喊個不休、嘈到吵耳，真係難為了祖母。
新亞校友/退休校長呂令意來電郵通知，香港長者協會主辦嘅「祖父母日」始由家起~從心出發，有一個頒獎典禮，在十一月九日下午二時三十分假摩理臣山香港專業教育學院鵬程堂舉行，由張建宗、梁智鴻、陳秀青、林正財等人主持，今年為第二屆，繼續宣揚孝道精神，以「心」為經，以「行為」為緯，冀祖父母、父母、兒孫達致長幼共融孝愛互傳，缺一不可，樹立優良家風，發揚家教。「祖父母日」之形像大使胡楓與梁舜燕呢兩位老牌影星，模範祖父母會與在場人士分享做祖父母之心得。有意到場人士可致電27286577留位。