準備本周六去澳門嘅「萬人迷」碧咸，噚日早上10點先去杭州西溪淘寶城拜會阿里巴巴老闆馬雲，碧咸照例簡單穿一套西裝已經靚仔到暈。阿里有咁多瓣數，馬雲搵得碧咸參觀阿里總部，總唔會只係隨便到此一遊咁簡單啩，大家即刻狂估佢哋可能有乜嘢合作。
碧咸早排推出威士忌品牌Haig Club，孖屐其中一個估計，係碧威可能會將Haig Club放喺阿里嘅天貓度賣；又有人估碧咸會為阿里每年11月11日（下周二）舉行嘅光棍節做明星拍檔。
另外有消息指，碧咸此行，有機會傾吓同阿里影業（1060）合作，仲講到似層層咁話，碧咸可能同李連杰、文章主演《鬼吹燈》第二部，有內地傳媒搵到阿里影業執董張強，佢就話唔知道。