為備戰下周四喺台灣展開嘅東亞盃外圍賽，港足呢個禮拜馬不停蹄咁練波。噚日有埋啱啱幫中甲石家莊永昌衝超成功嘅白鶴（左三）歸隊，僅僅湊夠「七俠」，依然無損教練金判坤（Kim、下圖右）嘅心情；佢噚晚仲請傳媒擦番餐韓宴，補祝亞運隊連續兩屆殺入16強㖭。
港隊自周一開操以嚟，一直只得小貓3、4隻，雖然傑志前晚喺上海作客踢完滬港球會盃首回合，但噚日都未返得切嚟，只係得白鶴、陳文輝、科夫、梁振邦、積施利，加埋「東方孖寶」李志豪同葉鴻輝7個球員出席；當中啱啱領軍升上中超嘅白鶴仲要整親隻「鶴腳」，只喺場邊拉筋，冇跟足練波。
阿Kim收操後話︰「白鶴喺升班最後一場前整親，最後一場都係軍醫幫佢打止痛針落場，但為咗唔想加深佢傷勢，我呢排都唔會逼佢練，希望佢禮拜六練得番，下周一隨隊友賽太陽飛馬，再出發去台灣。」
宴請傳媒賀亞運隊
雖然練波唔齊人，又有個主力傷咗，但飯依然要食，仲要食番餐好嘅，補祝港亞運隊連續兩屆殺入16強。兩個月前阿Kim喺南韓請完班球員後，已經講過請埋班傳媒食番餐；牙齒當「金」使嘅阿Kim當然冇食言，噚晚請一眾行家喺尖沙嘴一韓式餐廳擦餐勁，仲豪言如果港隊殺入東亞盃決賽周，再請大家食過㖭。港隊，加油呀！
識睇，一定係睇足英台【英波Live】：
http://soccer.appledaily.com
http://bit.ly/engballlive