金達集團（8266）股價近期突見異動，連扯數支小陽燭，配合同期頻繁換股票據兌換動作，似正暗藏巨變，董事局表明對任何投資機會持開放態度，相信落實時間應不遠！金達主業分為移動應用程式開發及資訊科技諮詢服務、買賣具兼容性解決方案諮詢服務之電子硬件組件及房地產投資三大瓣，旗下MTel主攻大熱手機應用程式，早已係市場領導者。但集團最大肥肉應係進展良好嘅住宅發展項目，位於廣東省陽江市，總建築面積達10.4萬平方米，當中香江半島進度較快，以家陣樓價計算，項目已值十幾廿億銀，係金達現市值約五億元嘅2至4倍。
金達原本大股東為中亞能源（850），另附有包括非上市認股證及換股票據衍生工具，而近期則見手持最大量換股票據嘅潘森不斷兌股，自7月至今再兌2.04億股，令手持股份增至4.31億股，佔17.6%股權，亦成最大股東，若再將餘下票據兌股，控股權將增至40.4%水平。潘森何許人也？正是注入陽江項目、而又身為中亞能源大股東及榮譽主席，如今正式揸莊，似乎會同中亞能源有重組後着，以咁嘅佈局衡量，相信金達應作多元化業務上市旗艦，未來會有好多可能發生！唔使多，望佢上返上月初0.27元水平，已經相當和味！
古道祥
本欄逢周五刊出