雨傘運動唔只喺香港遍地開花，直情喺國際間花開遍地。一班在台港生前晚發起咗真普選布條快閃活動，30幾名參與者分別喺總統府、台北車站、國父紀念館、故宮博物院、香港駐台北辦事處等地，掛出「我要真普選」條幅，之後仲將條幅送到台灣《蘋果日報》大樓，台《蘋》社長陳裕鑫親自接待。條幅其後掛喺大樓外，成為台灣首個掛上聲援雨傘運動條幅嘅傳媒。
陳裕鑫話民主係天賦人權，台灣同香港唇齒相依，希望台灣嘅民眾都關心雨傘運動；參與者之一、港生陳小姐睇見條幅高高掛喺大樓時話感動到直情想喊。快閃活動發起人、淡江大學資工系學生郭豫謙就話，佢曾經返港一周聲援佔領，返到台灣都希望支持仲喺香港作戰嘅夥伴，藉呢次快閃令香港同伴知道佢哋並不孤單。