我望住支82年可樂，我望唔透，我望唔清究竟呢個世界仲有幾多嘢係掌握到。我好迷茫。我含住成口萬樂珠，一口氣將支可樂灌落去。
氣體在我體內爆發的瞬間，我明白世上原來除咗藍絲、艾朗藍斯之外，藍剔都係災難。如果一切可以返轉頭，我寧願一世都唔用WhatsApp，又或者，冇揀到auto-update。
我叫阿文，聽個名就知係平凡角色。同巴打一樣，日頭打份牛工、收工陪女友、入夜再踩落金鐘嗰隻。自問係有為青年，就算月入冇萬四，但有個肯挨老麥嘅女友同一班豬朋狗友，生活其實唔錯。咁你問我點解走上呢條路？X，我都想問吓WhatsApp，點解整個藍剔系統咁陰毒呀！
（10:30am）
晨早流流，康仔首《有人喜歡藍》聆聲響起，我奇怪嘈醒我嘅唔係鬧鐘，唔係女友Yvonne嘅電話，而係老死Simon嘅來電，聽得出佢把聲係氣喘吁吁。
「你呢鋪大檸樂啦！仲唔check WhatsApp？」
矇矇矓矓間，我打開「開工啦，望！」的WhatsApp群組，我發現老闆罕有地踴躍留言，當中亦提到我的名字，以及大量粗口。
「文仔，你仲唔X死返嚟？」
明明day off嘅我，死死氣咁死返公司，仲俾老闆的咗入房。
老闆：我喺8時23分、8時33分、8時37分同埋8時42分都send咗message，全group人都read咗，得你一個冇反應。你係咪唔尊重上司？
文：冤枉呀，我…我…我只不過set咗隱藏最後上線咋，我有read到message㗎！
老闆：仲講大話，我見到你喺10時32分先至read我個message！唔使講咁多，限你兩分鐘執晒啲嘢，留低工作證！
離開公司前，我問Simon究竟發生咩事，佢先解釋WhatsApp呢個新增嘅藍剔function，可惜已經太遲。雖然係咁，能夠成為全球第一個因為WhatsApp藍剔而被老細炒魷嘅人，我反而有種飄飄然感覺，仲不停試呢個偉大功能。兩個鐘頭後，我又因為藍剔而眾叛親離……
（02:00pm）
《有人喜歡藍》再次響起，又係Simon，唔通條死仔咁快幫我搵到工？
Simon：你條文西！枉我識你咁多年，當你親兄弟，你居然勾義嫂！
文：乜呀又，我唔明喎！
Simon：仲扮嘢！Christie乜都講晒畀我知，話你好似癡漢咁成日盯實佢啲留言！你都對得住Yvonne啦！
嘟～～
我同Simon由小學識到𠵱家，係大學同房，畢業後又返同一間公司，就算佢係藍絲（深藍嗰隻），佢都冇unfriend我，估唔到因為藍剔而割席。我未向佢解釋當初只係試function，佢已經將我嘅疑似惡行唱通街。
當然，Yvonne都「會」知。我九秒九WhatsApp女友備案，順便哭訴呢個藍剔之亂。
喂喂，我俾人炒咗。（哭ICON）——下午2:15（兩個藍剔）
知啦，Simon講晒我知。（失望ICON）——下午2:20（兩個藍剔）
噢。——下午2:20（兩個灰剔）
外賣到。我已經唔再相信WhatsApp，打算親自打電話同Yvonne講清楚。妖，搵極都搵唔到散紙，今日真係黑到爆。
仲有咩好解釋？——下午2:21（兩個藍剔）
喂喂？——下午2:21（兩個藍剔）
喂——下午2:21（兩個藍剔）
做乜睇咗唔覆，係咪身有屎？（紅面ICON）——下午2:22（兩個藍剔）
仲唔覆？（紅面ICON X3）——下午2:22（兩個藍剔）
再唔覆，以後都唔使覆！——下午2:24（兩個藍剔）
宋文！你好囉喎！——下午2:24（兩個藍剔）
X，分手啦！——下午2:25（兩個藍剔）
我估唔到我行開嘅呢5分鐘，會係我生命最不能absent的5分鐘。邊條友話我睇過啲留言㗎？邊隻眼話我睇過啲留言㗎？頂！
我喪打畀Yvonne同佢解釋，但佢都冇聽，試過WhatsApp佢，但永遠出現一個灰到爆嘅剔。後來，我連佢嘅最後上線時間都睇唔到。因為，佢Block咗我。
我喺一日之內，因為藍剔而冇咗份工、冇咗個死黨、同冇埋條女。或者大家睇到呢刻，終於明白我點解會行呢條不歸路，但你永遠唔會明白，開發藍剔系統嗰條友仔諗緊乜乜乜。
完
撰文：杜秋棠＠抽水站
https://www.fb.com/freakingwestlook