民建聯蔣麗芸憑元秋一名「紅」爆政壇，但就唔鍾意長毛叫佢元秋。噚日立法會傾緊用特權法查特首，元秋發言時多番袒護狼英，讚到對方天上有、地下無；輪到長毛發言，佢話「狼英污糟邋遢，元秋相逢恨晚」，繼而「元秋」前「元秋」後咁稱呼元秋。點知元秋喺長毛發言後即時起身向主席曾鈺成投訴長毛叫佢花名：「可唔可以話佢（長毛）有問題？」曾鈺成反問元秋長毛犯咗邊條議事規則先？元秋講唔出，惟有話算數。
點知佢一坐低就發火鬧長毛，叫佢唔好再叫佢花名，不滿自己俾長毛「冒犯」，長毛不甘示弱反駁，曾鈺成見佢哋當場開拖，要求停止對罵，維護議會尊嚴，最終佢兩位自行離開議事廳。但明明好嬲嘅元秋，一出議事廳見到鏡頭即刻笑番晒，仲笑住話傳媒「陰佢」喎。