如果有朋友同你講，佢喺美國科技企業總部入面打工，通常第一個反應都係：「嘩！你就好啦。」因為呢類IT公司，無論設施定係員工福利，都出晒名照顧周到，令人羨慕。華華上個月就親身飛到美國矽谷，睇睇facebook（fb）總部有幾巴閉。
建築設計色彩繽紛
呢個2012年5月開幕嘅fb總部，行入去第一個感覺，好似去咗迪士尼樂園嘅美國小鎮大街，建築設計色彩非常繽紛。原來fb老闆朱克伯格當年為咗將總部設計得似小鎮，真係請咗兩名來自迪士尼嘅建築設計顧問。
由於華華去到嘅時候，正值午飯時間，所以現場人來人往，更似去咗迪士尼。不過，根據fb安排嘅導遊小姐所講，總部呢度一日到黑都好多人行來行去，咪以為佢哋偷懶，其實佢哋好鍾意邊行邊開會至真。
至於大家最想知嘅，當然係fb入面有乜令人羨慕嘅設施喇，登登登凳，8、9間任飲任食餐廳當然唔少得，甜品屋、零食吧、髮型屋、洗衣房、單車舖、甚至連機舖都有！導遊透露，遲啲仲會有間SPA中心，員工做嘢做到腦閉塞嘅時候，就可以走入去嘆番陣。
fb總部佔地約100萬平方呎，約有4,000名員工喺總部返工。總部正在擴建中，導遊話，fb推崇「黑客」精神，講求快同埋挑戰極限，又認為優化無止境，產品無完美，咁樣就解釋咗，點解fb總部，好似起極都起唔完咁喇。
李華華
mailto:[email protected]