廣州恒大搵簡拿華路做執行主教練，唔少人都擔心恒大又做水魚，始終簡拿華路之前只係做過助教，冇做過教頭，但呢位06年金球獎得主反擊質疑佢嘅人，「對於嗰啲質疑我零經驗嘅人，我覺得可笑，唔通佢哋嘅經驗要比一位為皇馬、祖雲達斯同其他世界頂級球會效力過、同時贏過世界盃嘅球員仲多！」
簡拿華路話，佢最欣賞恒大前鋒艾傑臣同中堅金英權，話佢兩個夠實力踢歐聯㖭；佢亦承認基拿甸奴同迪亞文迪兩名意大利球員狀態麻麻，要畀啲時間佢哋。「大簡」仲話教恒大人工豐厚，仲多過佢以前踢波嗰陣；同埋主教練納比遲啲會飛去巴西搵新球員。
至於喺周四晚舉行嘅中超頒獎禮，納比失落最佳教練，由北京國安嘅文沙路奪得。恒大射手艾傑臣除咗係神射手，仲奪得賽季最佳球員，但因佢要陪老婆生BB，所以由鄭智代領。至於最佳新人就係山東魯能嘅劉彬彬。
識睇，一定係睇足英台【英波Live】：
http://soccer.appledaily.com
http://bit.ly/engballlive