天下無不散之筵席，但佔領運動開席至今，卻未見有散席迹象，「去飲」嘅人犧牲高床軟枕當人情，為香港同真普選拉埋天窗贈興。家陣已經飲到面紅耳熱、甚至唔介意辭職發動公投嘅白鴿黨何俊仁，明年初又要去飲嘞，事關佢細仔要成家立室娶老婆；首度娶新抱、榮升老爺嘅仁哥，笑笑口話最驚屆時俾人拉咗，錯過呢場何家盛宴！
驚「去飲」俾人拉 錯過新抱茶
仁哥嘅兩位公子一向都好低調，甚少喺政界活動現身；而現年29歲嘅二仔係一位準律師。早前鐵頭仁絕食爭普選時，二仔拍住拖去探老竇班，原來佢明年同女友拉埋天窗，1月10日就會擺酒，開席請飲。
八方噚日恭喜呢位準老爺，問佢心情如何？雖然換來看似淡淡然嘅「都係咁啦」四個字，但從佢嘅四萬笑容，可見難掩喜悅。阿仔做老襯，作為老竇梗係要做見證人，但仁哥就笑笑口話，最驚到時因為佔中呢場飲宴俾人拉咗，反而去唔到阿仔做主角嗰一餐，希望醜嘅唔靈好嘅靈啦！
除咗阿仔有好消息，原來仁哥嘅千金亦有喜，換言之佢明年真正雙喜臨門，榮升老爺之外，又會有孫抱。當年請過記者食嫁女餅嘅仁哥，對抱孫則不欲多談，始終女婿並非政圈人，做外父嘅，少講為妙。
李八方
mailto:[email protected]