剛準備動筆寫《竊聽風雲3》嘅碟評，老友Andy就話隻《變型金剛》啱啱返咗貨，呢隻堪稱本年度最大作，冇乜理由唔寫，不過《竊3》都算係近年少見咁大卡士嘅港產片，而且爾冬陞、麥兆輝同莊文強，又係龍叔叔必捧嘅組合，就姑且將「外國勢力」擺埋一邊先，呢個禮拜睇睇《竊3》點樣延續上兩集嘅精采。
論港產片，唔計唧都唔識笑嘅八星乜乜乜同我愛乜乜乜系列，《竊聽風雲》系列算係肯使錢動用多位明星嘅作品，除咗劉青雲、吳彥祖同古天樂三個鐵膽，今集仲有曾江同吳孟達，外援又有周迅同黃磊，再搭埋林家棟同林嘉華兩位好戲之人，未睇己經聞到一陣鬥智鬥力鬥好戲嘅味道。
電影以土豪爭奪丁權做大橋，再以令人心寒嘅竊聽同偷拍科技做包裝，講嘅係幾兄弟點樣同心協力爭上位，一齊叫完雞仲一齊跟仙度拉唱「共你癡癡愛在……」，龍叔叔懶醒咁以為估到劇情走向：都係幾個大男人鍊贏新界老叔父嘅奮鬥故事。點知去到中段急起變化，為女人殺兄弟、勾義嫂、有內鬼、呃阿婆賣地等，呢班男人原來毫不浪漫。
講番首主題曲，可能90後會覺得無厘頭，要懷舊不如唱《前程錦鏽》仲好。其實呢首歌係1980年TVB電視劇《風雲》嘅主題曲，套劇正正就係講新界迅速發展，對新市鎮居民嘅衝擊。有意思，不過唔係咁多人會get到囉。
造型出色 劇情混亂
為重現土豪嘅特質，幾位角色造型都花過心思，好似古天樂薯到冇朋友嘅大陸仔造型、方中Sir留長髮戴黑超扮上海仔，其餘男角亦係土氣十足，呢班型男放下身段唔再chok靚樣，絕對新鮮感十足。老戲骨曾江真係好戲到無話可說，由霸氣到落泊，都流露出令人折服嘅神采。吳孟達出鏡唔多，不過又係奸得好有味道。
劇情大橋其實好有發揮，只係編導野心太大、太多嘢想講，鬥智鬥力唔夠到位，搞到好多劇情同分鏡飛嚟飛去，人物角色關係難以一下子明白，觀眾可能會覺得混亂。雖然要主角死係呢個系列嘅指定動作，不過今集真係玩得太盡，幾乎一鑊熟冇一個有好收場，結局幾個人揸車互撞而×家鏟，真係草草收場到爆。
好毒的Atmos
至於藍光碟嘅表現，算係為套戲爭番唔少分。畫面銳利唔在講，更係首套港產片配備Dolby最新嘅Atmos全景聲音軌（唔計非公開發售嘅試機碟《門徒》）。雖然龍叔叔仲未儲夠錢升級家中音響，不過齋以7.1播放，幾幕落雨行雷、舞獅燒炮仗等，都感受到Atmos嘅清晰定位同更實淨嘅重低音，令龍叔叔好期待同樣收錄Atmos音效嘅《變型金剛》。最毒嘅，係bonus收錄咗五段Atmos示範短片，畫面以大自然靚景為主，但刻意營做嘅環迴聲效，真係正到冇朋友，引到龍叔叔流晒口水，好想好想好想跳入呢個坑。
其他bonus亦算有誠意，除咗製作特輯同演員訪問，仲以新聞報道形式，講解新界丁權嘅由來，一班演員扮番戲內角色接受訪問，懶正經咁都幾搞笑。
簡介：
簡介：幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
