現年50歲的翁靜晶一直栽培兩個女兒劉萬儀、劉幸儀做律師，助她打理律師樓，可是最終事與願違，23歲細女留在英國做健身教練，而27歲的大女劉萬儀雖然擁有律師牌，但因恨入娛樂圈，最終亦「叛變」簽約模特兒公司做樂基兒師妹，月中便會以模特兒身份出席手錶品牌活動，昨日翁靜晶獲本報通知才得悉女兒正式殺入娛樂圈，她表現震驚又激心，語帶無奈說：「咁我可以點吖！唔通用極權？」
翁靜晶當年退出娛樂圈轉做律師，她一直希望與已故武打導演劉家良所生的兩個女兒能繼承衣鉢，成為執業律師，替她打理事務所，故多年來都採取嚴厲教導方式栽培兩女，雖然兩個女兒都能完成她心願考獲律師牌，但細女幸儀有着父親的好動細胞，決定到英國定居及擔任健身教練，翁靜晶本來對大女萬儀寄予厚望，未料萬儀對娛樂圈充滿憧憬，與妹妹一樣放棄做律師，決心以27歲之齡加入娛圈，令翁靜晶相當激心。
唔做律師轉讀歌劇
本報昨日致電翁靜晶，欲了解萬儀簽約模特兒公司一事時，豈料她在記者口中才知道此事，表示未獲女兒萬儀知會：「我只係知道佢17日會出席一個手錶活動，唔知道佢已經同Model公司簽……咁你話我可以點吖？唔通用極權？以前我唔相信民主，但我知道壓迫產生出嚟嘅後果會後悔，我逼佢去返工咁又點？到50、60歲又點？咁惟有支持啦！」
翁靜晶坦言萬儀對娛樂圈工作有興趣，正因為這個原因，才要她攻讀法律：「我知佢哋兩個都唔想讀，次次考試都怨天怨地同喊晒口，但我都係第一次做人阿媽，邊學邊做，而且除咗讀法律，我唔知叫佢讀乜嘢係好。」她又指萬儀曾在英國律師樓工作兩年，最後辭職後才告訴她要到紐約讀歌劇，翁靜晶說：「佢拍過電影《十萬火急》做方中信個女，因為咁識咗杜琪峯，所以去紐約讀演藝課程都係杜琪峯幫佢寫推薦信，我都係之後先知。」
逼得太緊愧對女兒
雖然接受不到萬儀放棄律師工作加入娛樂圈，但翁靜晶表示也會支持女兒，因為給女兒自由，等於給自己自由，還向兩個女兒說對不起，她說：「其實我都對唔住佢哋，明白一個女仔花7年時間讀唔鍾意嘅嘢好慘，我某程度係有規限佢哋一啲嘢，好似18歲前唔畀出街，如果唔係讀法律就要自己搵錢去讀，變相都係要佢哋讀。」
劉萬儀瞞着母親簽約樂基兒所屬的模特兒公司，負責人Chris則說：「萬儀好聰明，我哋會畀機會佢乜都試吓，但首先係要佢踏出第一步，睇吓習唔習慣入行後面對好多唔同嘅眼光先，唔會逼佢學行catwalk。」
採訪：小米、嵐山
【三個粉絲去首爾】
追星實錄，即上韓劇讀： http://hk.apple.appledaily.com/kstar