體記足球隊逢周二有練習，小弟之前遇上放假時都不時有踢，但間中遇上天氣欠佳，或者同大新聞撞期，出席者只得小貓3、4隻都試過，結果要射電箱、射龜打發個幾鐘；估唔到堂堂香港隊練習，竟然遇上如體記嘅問題，星期一開操只有4名球員出席，諷刺地教練團仲多1人；最近老董出山，到底香港足總所謂鳳凰計劃，係唔係同老董當年8萬5計劃咁，無聲無息咁唔存在。
其實當國家隊比賽係苦差，好多足球發達國家都出現，英格蘭就係表表者，利物浦新晉中場史達寧，喺上一輪國際賽就搞出大頭佛，英軍領隊鶴臣（左）就自爆，史達寧同佢講因為佢好疲累，可唔可以唔踢正選，結果就俾一班老牌國腳狂插，之後仲俾英國報紙踢爆史達寧喺國家隊比賽期間夜蒲㖭。
國家隊比賽成為苦差，已經係好多英格蘭球星面對嘅問題，講真𠵱家嘅球員太容易拎到高薪，根本唔使喺國際賽證明自己，但代表國家隊比賽，其實又係另一個發展層面。講真，19歲嘅史達寧喺上季初出道確實令人眼前一亮，右路快放令對手食塵，但今季進步程度實在令人失望，當然佢都面對成名之後被對手針對性凍結，但咁快就面對樽頸位，就真係少見。
利物浦領隊羅渣士對皇馬前夕，特別點名叫史達寧學吓對手C朗嘅態度，我唔知有冇弦外之音，但希望史達寧唔好成為一閃即逝嘅新人。
文：牽牛