樣靚、身材正嘅女士，唔係通常受歡迎啲㗎咩？原來唔係必然嘅，我求大俠近排先知喺某啲場合，呢啲靚女、索女會被列為「不受歡迎」，甚至被「妖孽化」。塞爾維亞傳統勁旅貝爾格萊德紅星，早前就禁止一位25歲女主播卡塔蓮娜入場幫球隊打氣，原因好簡單，就係佢太靚、太索！
做訪問球員分心
嘩！太靚、太索，都係罪？唔係Eason點會有首歌叫《美麗有罪》呢！呢位為紅星主持其中一個體育節目、叫卡塔蓮娜嘅女主播，就話之前幾次入場，喺場邊都俾保安要求離開，驚佢企喺度會令球員分心，搞到球隊輸波。
另外，卡塔蓮娜仲話平時同呢班球員做訪問時，班球員都唔敢直望佢，驚集中唔到精神。通常班球員就算唔係答非所問，都可能遲疑咗一陣，先答到條問題，佢話如果咁樣長期落去，好擔心自己會冇咗份工，但身為紅星忠實粉絲嘅佢，就梗係唔想因為咁而冇咗呢份dream job啦！佢話其實情況已慢慢有改善，啲球員都開始慢慢適應到同佢做訪問，而紅星目前成績都唔係好差啫，仲排緊聯賽第2位。
智利乳神最高招
不過，以上說話全部都係卡塔蓮娜自己講嘅，甚至有人覺得佢可能係想博見報，先走出嚟講一大堆嘢，大家如果仲記得世界盃期間，又係有好多女主播做啲出位行為嚟增加知名度，好似智利嘅露bra乳神紐妮絲，整個智利國旗款嘅bra「賣大包」，呢招真係高。
我求大俠睇過卡塔蓮娜啲相同佢instragram，係就係幾性感，但個樣好似就老咗少少囉，同埋要靠化濃妝嚟遮住自己啲缺點，相比紐妮絲呢啲，又真係輸咗成截。唔怪得上香港嘅網上討論區睇一睇啲留言，啲網民都一致話佢麻麻哋。不過，我哋又唔係紅星球員心裏面嗰條蟲，東歐人嘅眼光，我哋又識條鐵咩？
識睇，一定係睇足英台【英波Live】：
http://soccer.appledaily.com
http://bit.ly/engballlive