發展商為咗賣樓可以去得幾盡呢？曾被一手住宅物業銷售監管局批評物業名稱涉誤導、位於紅磡嘅何文田山畔，發展商永泰為咗sell樓盤近港鐵站，專登喺觀塘嘅示範單位兼售樓處旁邊搭建一個預計2016年先至通車嘅「何文田站」，遠睇幾可亂真㖭㗎！
何文田山畔嘅示範單位兼售樓處位於觀塘安盛金融大樓，為咗畀準買家體驗樓盤同將來嘅港鐵站有幾近，永泰高層陳玉成話自己實地行過，大約3分鐘就到，於是就喺售樓處樓下搭咗個「何文田站」出口，睇完示範單位落樓下港鐵站，剛好3分鐘喎。
呢個「何文田站」嘅真身係安盛大樓嘅一部份，變身之後，真係超似港鐵站出口，正面圍板嘅3D效果相當好，唔少途人行過都望多兩眼，甚至拎出手機拍照，有人仲爆笑話，何文田站多咗個「觀塘出口」。