今季見到史達寧（圖），覺得呢個年輕人都幾慘，除咗話吓攰都俾人插足成個禮拜之外，佢喺球場上真係孤立無援，令人覺得好無奈。
睇今季利物浦啲比賽，進攻套路來來去去都係靠史達寧，靠佢喺邊線一個爆贏兩個出波，靠佢走入中路喺禁區邊遠射，有時仲見過佢同對手啲中堅爭頂頭槌，接應隊友後場嘅高波長傳，真係一個人打幾份工咁！
做組織、放直線，應該係10號仔菲臘比古天奴做，但呢個巴西中場今季9成時間隱形，結果咪要史達寧做埋佢嗰份。佐敦軒達臣、祖阿倫、盧卡斯呢啲零創造力球員，喺中圈互傳一大輪但都冇建樹，最後通常都係交畀謝拉特斬上去畀史達寧，等史達寧爆入去。
講到爆，即係引球突破，又係史達寧唔做就冇人做。史杜列治長傷，加埋巴洛迪利同列基林拔慘不忍睹嘅射門效率，史達寧真係嘆口氣，又要負責埋最後一腳。佢身邊呢班傳、射、帶都唔掂嘅隊友，真係當佢係蘇亞雷斯咁用。19歲仔，喺英超企穩咗一季咁大把，一個孭起成隊波，就算唔腳軟，都會精神疲倦啦。
羅渣士，希望你可以錫住史達寧，唔好揠苗助長。佢𠵱家需要充足但唔過量嘅上陣機會，慢慢成長，而唔係叫佢「既當爹又當媽」，場場孭起成頭家，咁對球隊同球員都唔係好事。歸根究柢，都係羅渣士季初太淡定，睇少咗蘇亞雷斯離隊嘅影響，沿用上季踢法但唔買返個具級數嘅球員返嚟。
文：咖喱