佔領運動展開以來，學聯一眾大學生領袖表現出眾，無論外形同口才都贏得公眾讚賞，尤其係周永康、岑敖暉同羅冠聰三子，已經成為女生爭住朝拜嘅男神。與此同時，男神長駐嘅金鐘夏慤村，已經起咗個可以容納過百人嘅露天自修室畀同學仔溫書做功課，貫徹罷課不罷學嘅初衷。
但現實充滿矛盾，好多同學嚟到自修之餘，又會想一睹Alexter風采，分心在所難免。夏慤村村民將計就計，喺自修室一帶張貼多張男神大相，加上警告字句「想做我師妹？溫書囉！仲望我！」、「I WANT YOU TO STUDY RIGHT NOW」等等。村民相當欣賞呢個激勵手法，仲比喻為補習天王海報。但八方唔係好肯定呢個策略，係成功幫助同學專心學習吖，抑或反為令男男女女同學更分神？