說好的滬港通雖然到家陣都未見蹤影，不過，過去半年出盡力狂推滬港通嘅港交所（388）行政總裁李小加仍然未有放軟手腳，繼續為滬港通四出奔走。
華華前日中午12點左右喺香港站巧遇李小加，佢話啱啱開完會準備返上IFC寫字樓，見佢手上無端端揸住一本印有立法會金融服務界議員張華峰個嘜頭嘅小冊子，好明顯係啱啱同張華峰見過面喇，但李小加顧左右而言他，唔認同張華峰gathering。
二人曾鬧不和
李小加唔想張揚，張華峰就好大方咁承認，李小加前日早上親自走去金鐘立法會同佢見面，就滬港通問題傾咗成粒鐘，今次仲係李小加第一次去立法會搵張華峰見面㖭呀。
大家可能唔記得，李小加與張華峰舊年初曾經因為報價機月費問題有些少過節，當時張華峰要求港交所減月費，李小加就土豪上身話，「錢解決到嘅問題，畀晒你囉！」激到張華峰話要向港交所主席周松崗投訴。
雖然之後兩人表面言歸於好，但係大家都估佢哋口和心不和，張華峰上周四仲撰文，叫李小加就滬港通未開通還金融界一個交代。聞說，李小加本周一就約張華峰周二見面，畀足面對方。
兩人見面，當然提及滬港通幾時開車，李小加就叫張華峰畀多啲信心喎。之後，張華峰又要求李小加將本地券商使用港股報價嘅月費調低，李小加捉到路，即場耍太極，推搪話等滬港通開咗，交易所有多啲「水」先至考慮。
雖然今次兩位嘅會面都係各自表述，冇任何成果，但張華峰形容今次氣氛融洽，只係話李小加係生意人，下下都計住條數咁啫。
李華華
mailto:[email protected]