唔睇唔知驚!揪出11月高危練馬師

唔睇唔知驚!
揪出11月高危練馬師

今季最令人驚喜嘅騎師,當然係何澤堯,至今已贏咗13場頭馬,包括夥拍「喜寶駒」勝出三級賽國慶盃,被喻為新華將一哥;而練馬師方面,暫時帶頭係方嘉柏,大家都唔會太意外,畢竟佢向來係冠軍級人馬,馬房亦實力雄厚;反而阿Me徐雨石有12場頭馬排第二,開季前大家未必估得到,不過呢位簡炳墀嘅愛徒,其實不嬲都係急先鋒,上季單計9至10月亦共贏了11場。
然而仔細睇睇往績數據,阿Me可以話係11月高危練馬師,事關佢上季11月贏得一匹「金紫荊」,前季居然亦一樣,僅憑「綠色快駒」一捷,好明顯呢位急先鋒經過一輪搶攻後,11月每每係全面回氣期。
雖然剛周日11月2號阿Me贏咗隻「金瀛」,但好可能已經係水尾強弩之末,估計本月餘下7次賽事,徐廐就算唔食白果,成績亦唔會太好。
仲有一件事對阿Me不利,就係旗下鎮倉寶「神舟十號」開鑼日特首盃全熱門倒灶落第後,不但被驗出心律不正常,原來仲傷埋右前腿肌腱,之後一直無露過面,已經停操七個禮拜,睇嚟上半季嘅短途大賽,都冇佢份咯!