94年港姐冠軍譚小環離開大台轉行賣魚蛋，同屆獲最上鏡小姐嘅黃𨥈瑩，當年同古天樂拍劇撻著，係古仔唯一承認過嘅女友，同古仔分手後，雖然未知目前仲係唔係單身，不過睇番現年39歲嘅黃𨥈瑩啲近照仍然省鏡。
昨日有雜誌爆黃𨥈瑩秘密轉行，入股去張兆輝開設嘅美容院，做老闆兼sell自己做「生招牌」，退出幕前，專注搞美容，難怪索咗咁多。
據雜誌指黃𨥈瑩差唔多每個禮拜，去美容院開會兩、三次；有時有新貨到，黃𨥈瑩仲會自己落場示範做推廣，不過雜誌都有向張兆輝老婆求證，張太只係話黃𨥈瑩成日幫佢哋美容院做示範、影低啲相，再攞啲相去其他美容院做推銷，可能係咁先令人誤會，以前黃𨥈瑩有份投資。
該報道都有問過黃𨥈瑩，佢都承認跟張太學習緊，想吸收多啲呢方面嘅知識，覺得對美容方面有好大興趣，希望將來喺呢方面發展，佢喺報道又指，當年喺大台拍劇壓力大，好易出暗瘡，塊面留咗好多印，現時有保養，皮膚好咗好多。