佔領運動持續咗超過一個月，巴士公司肯定係最大苦主之一。九巴宣傳刊物《今日九巴》最新一期，封面古仔就係講佔領運動。咪以為九巴好似嗰班申請禁制令嘅小巴、的士大佬咁，狂鬧佔領運動罪大惡極，八方睇完發現內文幾客觀，冇乘機擦中央鞋、亦冇藉勢譴責示威者，有車長仲分享同市民合力搬鐵馬為巴士開路嘅點滴軼事。
車長讚佔領者克制
查實呢一期內容主要講九巴140條巴士線受佔路影響後點應變，其中訪問咗9月28日當晚目擊佔領事件發生一刻嘅車長同車務督察，高級車務督察Roy當時就喺崇光百貨對出怡和街同佔領者鬥搬鐵馬，佢見到一班人搬鐵馬封路，就衝出去將鐵馬搬走，有行人仲幫拖搬埋一份，成功畀10架巴士開走，但鐵馬越嚟越多，佢最後都寡不敵眾。
九巴有六架巴士亦一度被困旺角佔領區，成為佔旺景點。其中171線車長耀哥話，當時雖然有大班人湧出馬路圍住巴士，但佢一啲都唔驚，因為當時雖然人多，但冇特別混亂。另一位3C線車長興哥仲讚佔領人士克制，冇毀壞巴士又冇騷擾司機，但見九巴車身被貼晒字條，九巴都呼籲市民唔好破壞巴士。
有人話佔領運動令社會撕裂，但睇完呢期刊物，就知司機同佔領者未必係敵對，九巴客觀講番自己一方故事，亦係紀錄低佔領運動歷史。
李八方
mailto:[email protected]