港籃歷史性贏南韓！一連6日嘅亞洲大學生男籃錦標賽，噚日喺台北上演最後一輪分組賽，港隊喺A組以98:95爆冷險勝有周健宏倒戈嘅南韓明知大學，兩戰兩勝，以首名殺入4強。
兩隊今仗喺法定時間打成75平手，加時後仍然以85:85難分高下。港籃喺第2次加時，憑理大生吳嘉軒嘅4個罰球奠勝，繼贏菲律賓後再贏一場。今年先由男拔升讀理大嘅蔡再懃，攻入全場最高嘅27分，教練譚偉洋都忍唔住大讚佢：「我做球員10幾年都冇贏過南韓，今次真係好興奮。球隊兩次加時都堅守到最後，特別係3個替補球員阿懃、嘉軒同蘇尚瀛發揮理想，攻守上好大貢獻。」
至於前港籃代表周健宏倒戈只係貢獻10分，賽後都話輸得心服口服：「今次衰在輕敵，初段收起大部份主力，我又有傷在身不在狀態，輸波要負一定責任。」港籃殺入4強後，聽日晏晝4點會對B組次名中華台北；後者噚晚喺「中台大戰」以89:88險勝；另一場4強就會由中國惡鬥南韓。
識睇，一定係睇足英台【英波Live】：
http://soccer.appledaily.com
http://bit.ly/engballlive