被認為係球壇好男人嘅卡卡，睇嚟都保唔住呢個金漆招牌，隨時同佢班巴西師兄弟一樣變賤男。呢位32歲巴西靚仔中場，喺周二同太太卡露蓮一齊發表分居聲明，結束呢段長達9年嘅婚姻生活。至於點解搞到要離婚？卡卡冇喺聲明入面講，但畫公仔唔使畫出腸啦，咪係衰鹹濕偷食囉。
巴西球星除咗好波，仲好爛滾。「肥哨」朗拿度、「細哨」朗拿甸奴同埋阿祖安奴都係滾紅滾綠滾天光，其中肥哨更衰到連人妖都玩埋，不過卡卡卻係濁世中嘅清泉，堅決唔做大滾友。現時以借將身份為巴甲聖保羅效力嘅卡卡，同佢太太卡露蓮一直被認為係球壇嘅金童玉女。佢哋兩個喺2002年相識，拍拖3年後喺2005年拉埋天窗，卡卡仲話明喺結婚之前會保持處男之身，亦成為一時佳話。婚後佢哋生咗一仔一女，以為佢哋一家4口好幸福，點知都係失敗收場。
疑似搭上巴西小姐
卡卡同卡露蓮嘅分居聲明表示：「經過9年甜蜜嘅婚姻之後，我哋決定分開。我哋喺呢段美妙嘅愛情之中擁有兩個好可愛嘅小朋友，作為父母，我哋好愛佢哋。婚姻中我哋互相尊重、感激同埋欣賞。我哋知道對方喺自己生命中係非常重要，而喺呢個巨變，希望可以保護我哋一家人嘅私隱。多謝大家嘅關心同諒解。」
卡卡冇解釋點解離婚，但巴西傳媒透露，卡卡呢幾年周圍走，去完西班牙踢皇馬又重返意大利效力A米，之後喺明年初又會正式登陸美職聯效力奧蘭多城，兩公婆聚少離多，感情亦轉淡。不過，消息人士就話分隔兩地係假嘅，卡卡偷食先至係搞死9年婚姻嘅元兇。查實喺今年6月，卡卡就搭上現年21歲嘅2013年巴西小姐冠軍奧莉華拉，當時佢同卡露蓮都矢口否認，仲搵律師出嚟澄清兼且喺社交網絡闢謠；但有傳當時卡露蓮經已搵咗律師同卡卡搞離婚。事隔5個月，卡卡終於宣佈離婚，唔使我求大俠講，大家心照啦！
識睇，一定係睇足英台【英波Live】：
http://soccer.appledaily.com
http://bit.ly/engballlive