上星期做咗空中飛人，趕返回香港無得休息，星期六又要出席「中國大西北投資講座」，同場仲有老友記Kenny鄧聲興喺度，每次做講座，唔在於有幾多報酬，最緊要係同粉絲互相交流，好開心！
有朋友睇完《蘋果》後叫我做妖股並話響咗朵（過獎了）。另一方面，佔中運動令大家多關心時事及政局，相信會多咗人睇報紙以及上網睇新聞。點都好啦，能夠為大家寫稿，最緊要係開心同有迴響，我相信默默向上游，係總會有人發覺你嘅努力！
睇實港視高陽
喺講座中，我做主持，難得同Kenny同台，由於已經接近年尾，於是一人講一個冧巴畀粉絲，我就更加好，雙響炮！Kenny講咗隻康健國際（3886），因引入台灣大型金融機構，令隻股一嘢喺星期一爆咗上去。
我作為《蘋果》嘅專欄作家，梗係推介我講過嘅魔法股——香港電視（1137），如果上星期六粉絲相信我，喺星期一開市買的話，三日累計升咗20%，應該可以有小小交代！
Prof J喺文章中曾經提及過，港視王主席作為科網達人，同時間知道乜嘢時候向大家分享公司嘅狀況，令到佢變咗隻米奇老鼠一樣，懂得將最美麗嘅煙花，燃點起來！
將大品牌慢慢放喺公司嘅平台上，令佢得到大家相信佢嘅平台嘅魔術性，再配合網絡經濟2.0出現，睇電話多過睇電視，令到佢嘅魔幻舞曲更加好睇！我諗魔法仲可以繼續，睇吓呢場魔術表演係點樣玩落去！
另一隻推介股高陽科技（818），啱啱睇咗個研究報告，呢份報告寫得非常之好，Prof J決定將佢視為第二隻Prof J魔法股之選。
今個星期決定謝絕外遊，勤力研究，為大家喺聖誕節預備一份小禮物，就咁決定，讀者們收到未？
徐燦傑
齊魯國際控股首席策略總監
本欄逢周四刊出