國際拍賣行蘇富比自從租落金鐘太古廣場一層做藝術空間後，經常舉行展售會，喺拍賣場以外，繼續吸引投資者參與私人洽購。下周一起（10至19日），蘇富比就會舉行畢加索版畫與陶器展售會，展出42件畢加索喺1905至1970年創作嘅作品，當中包括蝕刻畫、石版畫、陶瓷作品。
咁啱得咁橋，港大美術博物館早兩個月舉辦畢加索陶瓷展，展出過百件畢加索工作室與獨立出品嘅陶瓷、版畫，呢個展覽啱啱結束，蘇富比又話有畢加索嘅陶器展售會。不過兩者完全冇關係，只係真係咁啱，前後腳舉行有關畢加索陶器嘅展覽活動。
藝術其實不限於高價嘅著名藝術家作品，同樣位於金鐘，喺雨傘運動示威區亦不斷出現多件本地創作，一樣值得欣賞。