Google呢個星期喺台灣舉行亞太區傳媒活動，發佈會以「mobile first」做主題，最後一日活動，Google為來自亞太區各地嘅傳媒安排一個特備節目，就係上堂。
Google除咗教一班記者點樣利用Google各種秘技去發掘新聞外，仲邀請世界報業與新聞出版協會（WANIFRA）亞太區總監Gilles Demptos去分析傳媒業趨勢。講者分析話，𠵱家做傳媒要主力做移動平台，仲要做埋片；咪住先，佢講呢兩點，《蘋果》日日都做緊喇。
講講下，佢突然問現場有冇《蘋果》記者，原來佢準備咗其中兩頁Powerpoint，正正就係以《蘋果日報》做研究個案，佢仲大讚《蘋果》嘅多平台發展好成功，動新聞非常受歡迎，網頁點擊率短時間內翻幾番，係非常之amazing咁話。