近日內地A股出現了一宗「吸睛度」極高的新聞。一間從事水產養殖事業的公司獐子島，聲稱其位於大連長海縣的海洋牧場，因最近遭遇了「幾十年一遇」的「冷水團」，令3年前播苗、總值7至8億人仔的扇貝慘遭「滅頂」，一鋪過死晒，公司因此勁蝕。券商和投資者對公司這個「奇情過雲海」的解釋，自然唔收貨，高呼「生要見肉、死要見殼」，要求監管當局調查。究竟扇貝離奇死亡事件，是否真正的「天災」，恐怕又會成為一宗無頭公案。
事實上，公司把業務突然走樣、歸咎於「意外」或「自然災害」呢招，的確是「好使好用」。經典例子如某隻工業股，最鍾意用「失火」呢個原因來解釋業績唔好，個廠幾年前才燒完，不久又再火燭，猶如「撞邪」一樣。
又例如某隻多年來備受質疑的果業股，過去幾年每次公佈中期、全年業績，都會吐苦水說因為「霜凍」、「暴雨成災」或「土壤流失」，搞到夏橙、冬橙，冚世界的橙都失收。之後天災仲唔夠，更出現蟲害，說橙樹患上「柑橘潰瘍病」，產量又大跌。去年公司使出「撒手鐧」，話要斬晒幾萬棵冬橙樹，改種香蕉，重頭來過。點知今年又遇上特大颱風，廿幾萬棵香蕉全數覆沒。真係黑仔到你唔信。
所以話，買農業股，想夜晚可以安心訓得著覺，有時真係好難。
海迪