講到明2016年卸任立法會後唔爭連任，而2017年特首選舉亦唔會落場玩，再加上一早冇咗全國政協委員職務在身，令民建聯創黨主席曾鈺成，亦好似被搣柴後嘅自由黨田少咁，可以就住政局、尤其係狼振英施政暢所欲言。
日前佢接受傳媒訪問時候話喎，唔見到有外國勢力介入佔中，寸爆狼英話：「可能佢睇到我睇唔到，佢睇到好多嘢我係睇唔到嘅。」令唔少政界中人會心微笑，但對中央嚟講，佢或者越嚟越似民主派嘅「嘩鬼」咯。
既然無欲無求，曾鈺成唔只講嘢free啲，連形象都越嚟越hehe，萬聖節嗰晚，佢應邀出席民建聯「扮鬼扮馬Halloween Dress Up Party」，雖然只係擔任評判，但都着住袍戴埋魔法帽，同現場人士鬥法一番。