年紀大了，開始學習以不同角度欣賞事物，例如周日曼市打吡，我就會選基斯史摩寧為「最佳球員」。
看他先於上半場31分鐘冒着被全球魔迷咒罵白癡的代價，「衝擊」準備開波的曼城門將赫特，「勇奪」首面黃牌；然後不惜在全球直播鏡頭前鹵莽飛鏟，盡顯自己出腳有多慢、判斷有多錯，為的是甚麼？就是效法「周處除三害」，將自己這個後防計時炸彈盡快引爆，調離球場。君不見史摩寧「功成身退」後，曼聯的防守反而更集中、更緊密？最終作客兼大半場打少個下僅負一球，可喜可賀！
看！只要懂轉換角度，對事情便可有截然不同的看法。例如我們何時會願意對不合期望的東西「袋住先」？以紅魔躉為例，上仗看着史摩寧飛身落腳的那刻，首先當然希望球證張紅牌可以「袋住先」；當願望落空，看着迪基亞左飛右撲仲頂得住，半場零比零？梗係「袋住先」啦！到下半場終於失守，3年前遭蹂躪1:6、上季大敗1:4的畫面立即浮現，可以0:1完場？當然「袋住先」！識咁諗嘅曼聯球迷，應該明白呢場係「笑輸」。
只要明白唔「袋住先」會衰多幾錢重，人們就會欣然接受。將此原理用於香港政治困局，中央便有大把「好橋」喇──例如由人大通過，若政改方案遭否決，立即將香港割讓予北韓，由金正恩直接接掌，30歲以下市民要去服10年兵役……，咁仲唔個個爭住「袋住先」？
方柏翹
now足球評述員