「請槍」新聞時有所聞，估唔到堂堂尊貴嘅立法會議員，做功課時都要假手於人！話說工聯會郭偉強啱啱先完成理工大學社會政策及行政學士學位，有同佢同屆畢業嘅同學喺《壹錘定音》節目爆料贈興，話郭偉強其中一份功課係請助理幫手搵資料先完成，仲話郭偉強成日唔開會，名副其實係hea讀。
化名阿Will嘅郭偉強同學，噚日爆料話郭偉強喺其中一科佔分達50%以上嘅功課，請槍搵助理完成，透露郭偉強喺同同學開會期間，主動向同組同學提及，直認功課嘅背景資料搜集工作由佢助理而唔係自己做，但冇講明係私人助理抑或立法會助理！
阿Will話抄襲係嚴重問題，就算只係資料搜集咁簡單，都應該親力親為。佢仲大數郭偉強hea讀，例如開10次會、對方只出現2至3次；分工時又話工作好忙，希望負責簡單部份喎。
《壹錘定音》喺阿Will爆料後，上立法會網頁翻查郭偉強學歷資料，發現佢申報學歷為「社會政策及公共行政學士」，喺行政前僭建「公共」兩粒字，似乎連自己讀啲乜都唔太清楚。
八方翻查過資料，原來郭偉強接受左報訪問時講過，2009年報讀呢個課程，預計三年畢業，但後嚟入咗立法會後工作量大增，成日要走堂，結果其後每學期只能修讀兩個課程，三年課程最終要用五年完成，但一直堅持功課絕對唔能夠假手於人。
「助手太興奮」寫錯學歷
郭偉強向八方嚴詞否認請槍同hea讀指控，話啲論文係自己「嘔心瀝血」、逢週六日晚抽時間「摷書」寫成，同組同學都係半工讀，大家都互相幫忙，唔覺得有人有不滿，質疑有人化名齋噏又冇證據，「唔知係咪有其他動機」。咁點解連資料都填錯？佢話立法會網頁同工作報告資料都係助手填寫，話「由於助手知道我畢業太興奮，主動幫我更新學歷資料」，相信係一時寫錯。
李八方
mailto:[email protected]