呢排建制派不停話喎，佔領運動有外國勢力介入，原因係乜呢？例如成日都有一車車嘅水送去佔領區啦，又有美國教會背景人士開放地方畀佔領人士休息囉！嗱，如果建制派舉咗咁重要嘅「事例」，大家都仲係唔信佔領運動有外國勢力介入，覺得呢啲論據好戇居嘅話，八方實在不得不「見義勇為」，向呢班愛國人士提供有力「證據」，以免香港被外國勢力入侵。
大家擘大隻眼睇清睇楚嘞，喺金鐘佔領區嘅連儂牆，成班境外敵對勢力雲集，包括變形俠醫、Ironman、超人、蝙蝠俠、美國隊長、雷神同蜘蛛俠，佢哋似乎已經組成一個聯盟，聯合擺陣挑特區政府機。嘩，呢班外國勢力咁大膽喺佔鐘區「耀武揚威」，八方都睇唔過眼，中國外交部係時候嚴斥佢哋咪鬼「厚多士」！