佢身形肥肥哋，孔武有力，雖然唱歌都幾難聽，但佢唔會理其他人點睇，一有機會就要大展歌喉！究竟我求大俠講緊邊個呢？唔係《多啦A夢》入面嘅胖虎，而係曼聯前鋒朗尼。
呢排好紅嘅英國唱作人Ed Sheeran上星期喺曼徹斯特開演唱會，愛好音樂嘅朗尼當然有去捧場啦！個騷完咗，普通歌迷就散場走人，但朗尼又點同呢，佢約咗Ed Sheeran去間吧度一齊jam歌，一於encore！英國《太陽報》獨家披露Ed Sheeran同朗尼jam歌嘅片段，Ed Sheeran喺側邊彈結他，朗尼就主唱《Lego House》。
一開始Ed Sheeran都諗住專心彈，等朗尼個人表演吓。點知朗尼一開口，真係嚇親街坊，Ed Sheeran都即刻幫手唱，帶番朗尼入首歌度。就算其他人笑到收唔到聲，朗尼都面不改容，仲合埋咗對眼，唱到不知幾陶醉，喺度自high緊。之後全場氣氛高漲，一齊大合唱，掩蓋咗朗尼嘅歌聲。
觀眾嘲歌聲似貓叫
問番在場觀眾嘅意見，基本上都係插爆朗尼，話佢唱得難聽，但佢哋都好欣賞朗尼一樣嘢，就係面皮夠厚，五音不全都唔介意公開唱歌，唔怕俾人笑！有位觀眾話：「真係好好笑！佢似貓叫多過唱歌囉！人人都跟住唱，同埋笑佢，但睇得出朗尼係個講得笑嘅人。」其實呢次唔係朗尼首次開金口，佢3年前去巴巴多斯度假嗰陣，都試過喺當地酒吧高歌幾曲㗎！我求大俠覺得音樂係屬於所有人，就算唱得難聽都有權享受唱歌嘅樂趣，更難得朗尼有呢份公開演唱嘅勇氣。
費蘭尼吐口水甩身
另外，喺曼市打吡傷出嘅曼聯中堅馬高斯盧祖膊頭甩骱，據報需養傷3個月，但盧祖老竇話傷勢冇預期咁嚴重，唞3場就冇問題。至於涉嫌向阿古路吐口水嘅費蘭尼就走得甩，英足總話唔會調查呢件事。
識睇，一定係睇足英台【英波Live】：
http://soccer.appledaily.com
http://bit.ly/engballlive