所謂新人事新作風，「梁粉」羅康瑞今年6月出任機管局主席，冇幾耐就重提佢主張嘅機場北商業區發展方案，上星期無端端擱置北商業區酒店發展嘅招標程序之外，據聞，羅康瑞仲有意增加一個執行總監職位，想請一個人入去機管局專做商業地產項目，負責發展商場與酒店。
配合梁振英 力拓機場北
機管局現時有6位執行總監，分別負責財務、機場運行、企業發展、人力資源、建築工程，同埋商務，商務總監基本上就係負責機場嘅商業地產，管理零售租務，𠵱家做緊呢個位嘅陳正思（Cissy），喺2012年9月先至加盟機管局，佢之前喺希慎興業（014）負責商舖租務與市場推廣，喺租務界都有番咁上下經驗。
據了解，羅康瑞做咗機管局主席之後，好快已經提出要請多個總監專做商業地產，似係暗示陳正思嘅工作表現唔啱佢心水，想請多個人幫手。的確，羅康瑞從事地產界多年，另一個身份係瑞安房地產（272）老闆，最出名就係搞咗個上海新天地，佢要物色其他人入去機管局搞商場、酒店應該冇乜難度嘅。
作為忠實梁粉，羅康瑞主張大力發展機場北商業區，其實都無可厚非。梁振英一直想發展大嶼山，為配合預算喺兩年後落成嘅港珠澳大橋，其中一個構思就係發展機場北商業區，希望方便經港珠澳大橋抵港嘅旅客消費購物。
羅康瑞與機管局前主席張建東舊年就為咗應否喺北商業區興建地下車廠起爭拗，羅康瑞拗輸咗，後來張建東喺今年5月辭職（9月因血癌逝世），羅康瑞6月接任做一年主席，加上政府換入一批新董事，個別又係梁粉，整個局面已經唔同晒。
李華華
mailto:[email protected]