日圓跌到一個地步，令人覺得，如果今年唔去日本係有罪惡感。我甚至專登去諗應該買乜，最後個結論係買iPhone 6。點解係iPhone 6？因為日本一早已出冇鎖版，支援頻譜同香港版一模一樣，所以香港都用到。
更重要嘅係，以噚日日圓滙率計，全線iPhone 6一律平過香港，其中最抵嘅一定係16G iPhone 6，連稅73,224日圓，約4,980元，平香港足一成！其餘型號大約平7％至8％。所以一眾想換機但買唔到機嘅用家，去日本旅行時可以順便買機。
講返股票，噚日新濠環彩（8198）有突破，收市升咗14％！集團主業為中國提供彩票相關技術、系統及解決方案。首先公司8月時通過西班牙巴塞附近的Vila-Seca and Salou之娛樂旅遊中心興建及開發娛樂場的第一輪申請，可參與最後階段投標，一旦中標，可以幫股價打強心針。
另外，公司年中以0.9元「10供3」，除咗大股東新濠國際（200）按比例供股外，兩大包銷商德意志及花旗都有供股，合共佔供股後2.75%股權。新濠環彩股價最近已經跌定，噚日隻股收市都只係0.75元，保守地博去到供股價都有兩成升幅，以0.65元止蝕的話，兩個字：抵博！
Fifi
http://www.facebook.com/lovefrystock
本欄逢周二、四刊出