梁振英歡迎香港運動員自「亞洲傷殘運動會」榮歸，歡迎香港運動員榮歸，係一項政治正確之「行政長官政治運動」，點知佢呢排開口就講錯嘢，在咁嘅場合講選委會，竟然以體育及宗教界對香港GDP無甚貢獻，但仍有選委代表為例，說明選委會有廣泛代表性。於是本來想表示自己政治正確，變成示範一位政治人物如何口沒遮攔，出言不慎，之後體育宗教界人士向佢炮轟，可以想像得到。
香港體育數十年來不振，係眾所周知嘅事實，1950-1980之足球黃金時代，曾帶旺足球事業，可惜足總管理不善，足球已一蹶不振。有一位讀者來電郵話賽馬係王者運動，馬會一年交稅超過一百一十億元，梁振英乜唔知咩？梁先生應該知嘅，上季佢仲有不時到快活谷馬場享受特首包廂㖭，不過可能政府視賽馬與足智彩為博彩業，不是體育產業呢。香港唯一令世界矚目嘅體育項目就係七人欖球賽，每年為香港帶來不少高檔歐美遊客，世界聞名，但欖球係外國勢力範圍，「外來力量」影響，特區政府依家好忌外來影響力㗎。
全世界最大之體育產業，歐洲足球、美國棒球、美式足球及NBA籃球、F1賽車，計銀紙就係天文數字，淨係C朗、美斯兩人，轉會費要用億做單位，一個勒邦占士返鄉下，就為克里夫蘭及俄亥俄州帶來五億美元收益，唔怪得中國北京又要跟風，高調宣佈推動中國體育產業，把足球帶入校園成為國策，香港特區政府識唔識得跟風呀？
體育對GDP之貢獻，若純以金錢衡量，十分膚淺，美國英國澳洲嘅學校注重學生運動，除咗金錢利益（美國最誇張）之外，最重要嘅係培養學生之羣體合作精神，輸咗再嚟爭過冠軍之奮鬥精神，為了成功，必須恆久苦練之精神。唔參加運動嘅學生容易變成書獃子，染上太子病，公主病，以及輸唔起，不能接受失敗，畢業出到社會，容易一碰就散，缺乏EQ競爭力，若舉國之民盡皆如此，國家企業、創造力、整體競爭力如何可以提升？香港傷殘運動員余翠怡、單車女車神李慧詩等人就有堅忍奮鬥精神，可以感召年輕人不畏艱苦，磨練心智，佢地嘅精神力量，唔係金錢可以衡量嘅。香港每年咁多人參加馬拉松賽，邊個會諗到與GDP嘅關係吖？