相信唔少市民銀包入面儲儲埋埋唔少散銀，越嚟越重，唔知點樣可以花晒出去減磅。金管局兩部「收銀車」，十月開始運作，一個月走訪七個區收集散銀，一個月內已經收集到1,900萬枚硬幣，面值總共1,500萬元，果然係山大斬埋有柴。照咁睇，返屋企搵下，唔覺唔覺，隨時搵番幾千蚊出嚟喎！
華華𠵱家都留意緊金管局呢兩部收銀車幾時經過屋企附近，好想快啲清走家中嘅大堆散銀。喺金管局網頁，就可以睇到呢兩部車截至明年2月嘅日程表，部車每到一個地方會停留7日，每日辦公時間朝九晚七收集散銀。市民可以將硬幣唱成銀紙，又或者增值到八達通卡，仲可以捐畀公益金。
按金管局計劃，佢哋打算兩年後進行檢討，睇睇有冇需要加車，或者定點收集。