廁所係思考人生嘅好地方，有「中國蘋果」之稱嘅小米就選擇喺呢個地方幫員工洗腦，將企業文化傳播出去。位於北京嘅小米總部男廁，每個尿兜上面有一幅卡通公仔畫，用咗小米吉祥物「米兔」做主角，提醒員工每三個月改一次電腦密碼、禁止公眾場所吸煙、嚴打辦公室性騷擾等等。
比較得意嘅一幅卡通公仔畫，係一隻拎住步槍、身穿盔甲嘅米兔，被另一隻負責安檢嘅米兔截住，講咗句「你是來上班的，不是來參軍的」，寫明嚴禁攜帶違禁和危險品進入工作區。話晒小米成日辣着火頭，成日俾人話抄襲，唔知係咪驚俾對家上門尋仇呢？
小米近期確係新聞多多，《福布斯》話小米正考慮以400多億美元嘅估值進行融資，創辦人雷軍對上一次證實公司估值100億美元，只係舊年8月嘅事，如果消息屬實，即係話呢間科網公司，一年估值勁升3倍有多！