阿里巴巴主席馬雲真係神出鬼沒，上星期四佢先喺「來往」分享自己身處美國睇緊NBA，點知噚日傍晚時分，有人報料，話發現馬雲喺中環四季酒店出現，仲同近期人氣急升嘅全國政協副主席董建華一齊行入四季嘅中菜廳。
報料者喺中菜廳門外見到，馬雲兩次走出外面講電話。報料人偷聽到馬雲話，嚟香港係為開董事會，又自爆自己下星期一（10號）會返去杭州，估計佢應該為光棍節（11月11日）主持大局。
馬雲與董伯伯走埋一齊，都唔係冇原因，董伯伯係阿里獨立董事，阿里今晚公佈第三季業績，兩人事前見面都係正常嘅。不過，董伯伯近期籌備緊「團結香港基金會」嘅智庫組織，正招攬各方人才入會。馬雲明年就會成為香港居民，之前又發表過愛港宣言，董伯伯唔知會否順便邀請馬雲入會呢？