日本全日空的廉航子公司香草航空(Vanilla Air)來往香港至東京的航班日前首航。航空公司以單程$88的震撼價做首航噱頭，而且之後所有票種都一律免收燃油附加費，雖然航班時間「晚抵早返」不是太理想，而且暫時每周得三班，但一樣大有市場。首航當日，香草航空大走親民路線，登機前又擊掌又有首航登機紀念卡，日本人辦廉航，服務一定不失禮︰
1. A320黃飛機，制服至潮藍撞黃
全機有180個座位，椅子深藍色，以黃色做點綴，務實得來夠醒神。連安全指引的圖案都特別可愛。
2. 700円食肉醬焗長通粉，必試爆奶蛋
航班餐牌提供意粉三文治為主，無咩特色，要食限定的空中便當要等到12月3日才有。每款食品都註明卡路里和成份，菜名也如詩如畫，如叫「黃色誘惑」的牛肉蕃紅花飯，夠哂誠意。必試「過癮」的爆奶蛋，小汽球內裝了一隻鮮奶布丁蛋狀的甜品，像個水彈，吃時用牙簽從底部篤開，奶蛋破殼而出，但要提防爆奶。
3. 搞鬼免稅品
不管你有多廉宜實惠，得體還是日本人的宗旨。機上免稅商品不靠量多取勝，以古靈精怪引死人，包括壽司手機座、成田藍鳥機毛公仔。
香草航空還提供三種票價選擇，最貴的繽紛香草票，寄行李、揀位、改機票都不用額外付費！雖然蛤蜊價機票可一不可再，計過來11月中來回票價連稅都只是約$2,500起，真是燃油附加費全免。
網址︰ http://vanilla-air.com/hk
記者：林慧賢