華華噚日中午走去中環置地廣場買外賣，經過「娛樂大亨」林建岳喺三樓開嘅意大利餐廳CIAK-In The Kitchen門口，發現前經濟發展及勞工局局長葉澍堃嘅細仔葉瀚華（Ian）喺餐廳內，狀似招呼客人。經過一番打聽，方知Ian噚日係第一日喺呢間餐廳工作，佢想體驗一間餐廳嘅運作，為自己將來做老闆作準備。
本身係執業大律師
葉澍堃退休後幫雜誌寫專欄，主要係佢周遊列國或者喺香港四圍搵好嘢食嘅所見所感，唔使講都知佢鍾意食。佢細仔Ian今年約30歲，聞說亦係「食家」，由細到大經常跟阿爸周圍食好嘢、飲靚酒，今年初「阿一」楊貫一主理嘅富臨飯店開張，Ian就陪阿爸一齊去捧場。
Ian雖然係鍾意食，但原先嘅工作就同食無關嘅。佢十分叻仔㗎，英國劍橋大學經濟系畢業後，再修讀法律課程成為執業大律師，早幾年喺麥肯錫顧問公司做管理顧問，今年初離職，聞說佢之前成日教人點樣做生意，一直心癢癢想自己做老闆，佢對飲食有興趣，好似話諗緊賣紅酒，或者開餐廳。
佢諗來諗去都未知點，咁啱佢同負責CIAK嘅名廚Umberto Bombana又幾老友，於是就決定去CIAK幫手，諗住試做餐廳各部門，體驗如何經營一間餐廳，為自己將來開業做準備。華華噚日午飯時間見到佢負責帶位招呼客人。
老實講，開一間餐廳絕對唔容易，由食材、廚房、樓面、衞生等好多細節都要顧及，先至會成功，葉公子肯先打工攞經驗都算係實實際際咁行出一步，遲啲開業就可以搵阿爸做生招牌喇。
李華華
mailto:[email protected]