上個禮拜二，孫柏文先講過話班國際大鱷現時興講policy divergence，即政策上分道揚鑣，特別用花旗國同歐洲、日本舉例。即係由2008年起全球狂印鈔，變成有啲地方唔再印，有啲就加印。點知篇文出街後，先有瑞典央行減息，再有聯儲局停印，跟住就日本央行加印。
喺禮拜五日本加印之日，市場非常興奮。全球股市大升，日圓大跌。我喺2013年第一篇文叫大家「一注獨贏沽日圓」，當時87日圓兌1美元，我就話要沽起碼三年，先睇140再見200。而上幾個禮拜，我話過清倉揸現金，即同美元掛鈎嘅港元，因為除非聯儲局又話再印，如果唔係，就算話有排唔加息，美元超強勢已成，股市亦難有運行。
美元超強 股市冇運行
咁噚日睇曾淵滄專欄，博士大讚日央行印鈔票，話能振興經濟。振唔振到我就唔知，不過過去每一次美元展大升浪，就會令全球流通嘅美元收緊。大家最難忘嗰轉必定係對上一次，即1997年亞洲金融風暴。當日圓大跌，韓圜、人民幣呢？如果大陸要頂住人民幣滙率，貨幣供應必定要比現時更緊縮。啲公司借新錢去還舊債嘅能力，甚至啲人有冇錢落澳門賭兩手都全部有壓力，港股、樓市可以點？
破壞力咁大，日央行知衰時會否繼續印？會。原因係佢哋印唔係為乜「振興經濟」，而係因政府冇錢使。最初靠稅收，之後靠借，不過因為得番啲冇工返嘅老人家，日本儲蓄率變負數，所以靠印去㩒低息率。原本要飆升嘅息率唔郁時，就會滙率全硬食。
咁日本政府減開支得唔得？唔得。今期有套電影叫《山本五十六》上畫你一定要睇，當中講到話日本二戰如要攞英、荷東南亞殖民地，就要打沉美國太平洋艦隊。不過打美國係自殺，而知道係自殺嘅海軍都照出戰。日本央行行長黑田東彥，就係今日嘅山本五十六。印鈔就係末期病嘅嗎啡，天祐世界呀。
孫柏文
獨立股評人
http://facebook.com/shuen
本欄逢周二刊出