同狼英一向唔咬弦嘅鬍鬚曾，雖則冇當狼英係波士，直接收北京柯打，但喺反佔中一役上，佢卻冇好似其他問責官員咁，成日開腔對佔中喊打喊殺，最多咪做吓鍵盤戰士用網誌鬧幾句當交吓差。噚日鬍鬚曾更加上演真人騷，對記者使出太極hea功，一句起兩句止，將反佔中問題三扒兩撥hea走咗。
令在場傳媒滴汗
話說鬍鬚曾噚日同財經局局長陳家強同金管局總裁陳德霖出發訪京，唔少電子傳媒喺機場等佢，問吓喺佔中關鍵時刻訪京，係咪會傾埋佔中影響？點知鬍鬚曾一開腔就話，查實此行冇乜特別議題，都係恒常安排，淡淡然嘅回應令在場傳媒滴汗。
當問到佔中影響，鬍鬚曾大耍太極唔想答；滬港通係咪受佔中影響？鬍鬚曾話睇唔到有乜直接影響；咁香港好似任總所言，因為佔領運動失去中間人地位呢？佢話最重要都係靠自己努力㗎啫。
咁擔唔擔心佔中會喺APEC後清場呢？佢只回應：「唔會揣測任何事情。」咁見到京官時，會唔會反映佔中意見？鬍鬚曾使出終極hea功：「我唔會講畀你聽嘅！」面對鬍鬚曾hea住答，八方相信在場傳媒都冇乜癮。唔知京官問到佢嘅意見時，鬍鬚曾夠唔夠膽繼續耍太極呢？
李八方
mailto:[email protected]