西王特鋼（1266）單單係食住本身山東省基地，地區嘅城鎮化發展，已經係長搵長有。又呢期唔止祖國特鋼股，就算場內嘅鋼材股，就已經升咗一轉，西王係超落後。
西王係山東省主要特鋼同鋼材生產商。睇返主打基地有乜搞作，根據山東省2014至2020年城鎮化規劃，全省會有108個重點項目，總投資額2,060億元人仔，單係今年，撥資630億元人仔。而呢百多個重點項目，就包括煙台港西港區一期工程沿海港口泊位、青榮城際5條鐵路、濟南至樂陵高速公路，同青島LNG建設項目。
內地同業炒到癲
睇到係，因為城鎮化推動，加埋山東省本身要發展，推出唔少超重份量基建項目，當中，鋼材水泥呢類上家原材料，係唔少得。再講，西王近水樓台，又有規模同技術優勢，嚟緊日子，掂過碌蔗。
西王喺2012年上市價係2.65元，現價（1.11元）已跌咗近60%，家陣得4.6倍PE，又唔好估多，集團今年度增長，淨係keep喺半年度增幅12%，純利去到4.3億元人仔，EPS 0.27港元，預測PE得4倍。
又祖國同樣係特鋼股嘅撫順特鋼，呢轉炒軍工concept，五個月升咗240%，預測PE上到28倍，而方大特鋼，削削哋都升咗30%。香江場內，一般鋼材股好似重鋼（1053），5月以來都升咗60%。西王同期，係冇郁過！
又西王同樣都有做特鋼，若果日後爆多個軍工concept，祖國特鋼股咁癲，西王反映呢個concept，咁咪不得了？排除呢個可能，就算西王唔搞軍工呢瓣，單係追落後，翻一番，去到兩蚊樓上，今年預測PE先啱啱追到方大特鋼，但講緊都係得8倍水位，仲係超抵。
錢雋
細價股專家
本欄逢周二、三、五刊出