樂香園:達能買雅士利有古怪 - 海迪

樂香園:達能買雅士利有古怪 - 海迪

首先,雅士利(1230)呢間公司真係要鬧。2013年賣盤畀蒙牛(2319)時,兩個月前股價已偷步升30%。上星期到法國達能(Danone)入股,公司股價早一個月同樣升唔停,累漲50%。連續兩單重要交易,都「春江鴨」得如此猖狂,猶如七、八線細價股咁。保密工夫係咪做得咁差,定有其他原因,若海迪是證監會,好有興趣了解一下。
今次單交易,達能以44億元購入雅士利25%權益,作價較市場有16.7%溢價。吊詭的是交易無論以PE定PB睇,都貴到無倫,有人肯如此高價投資,但雅士利的股價之後卻不升反跌,瀉逾10%。熟悉雅士利的朋友就話,今次達能入股有兩個可能性:1.達能係傻仔,在內地奶粉面對渠道轉型、表現麻麻的時候走來買貴貨;2.或者達能同雅士利有啲大家唔知道嘅「默契」,單deal係有嘢「跟尾」。
雅士利2010年上市時,集資不過27億元,即今次其賣股規模,幾乎是做多一次IPO。雅士利已有約10億元(人幣.下同)現金,計埋今次集資,之後坐擁近50億元。而雅士利的擴產計劃到埋尾階段,明年新西蘭廠房投產,產能會倍增。上周搞電話會議,聞說分析員勁問公司有乜新搞作,管理層回答得模稜兩可。海迪相信世界沒有free lunch,有人送錢畀你使,終有一日你要找數的。

海迪