佔領運動持續進行，特首狼振英無心無力解決問題，繼續喺「下台」聲中展開新一份施政報告諮詢工作，呢排開始見唔同政黨。泛民同狼英見面，唔使問阿貴都估到話不投機。但今年嘅諮詢焦點應該放喺自由黨度，皆因該黨田北俊因為講咗句真心話，叫狼英考慮下台，結果「創造歷史」，成為首個被搣柴嘅港區全國政協委員。田少最終寧願企喺市民嗰邊，辭埋黨魁都唔肯收番倒梁言論，雙方碰頭，必然火花四濺，而今日就係呢場田狼會嘅大日子，唔知狼英會唔會為累咗田少冇咗個政協位，講句唔好意思？八方聽聞，自由黨今年份施政報告意見書翻炒上年嗰份，皆因狼英之前提嘅政策大部份都做唔到，自由黨提嘅更加聽完就算，冇吸納到，索性入去寒暄半個鐘就走人。