朋友在一間startup做了幾年，說越做得久，越發現創辦成功的startup，其實好難，以前身邊人說一齊搞startup，總會心癢癢，而家已再無這股衝動。
做startup之難處，九千多種，明顯不全是同級難度。最難是甚麼？一個切入點，是從投資者角度去看。Startup投資者，無論是天使還是風投，有兩點，個個重視：一，團隊是否強勁，勁到夠贏。二，個題目在未來幾年，會否變到好大好大個餅。好大個餅的贏家，自然值得投。當然，重視還重視，估中還估中，startup投資者總的來說，其實埋單蝕多過賺。
兩大因素致勝關鍵
換轉從創辦人的角度看，其實也一樣。你問startup創辦人，搞startup最難的是甚麼，無論新手老手，兩點一定會提到：一，如何找勁人加入團隊，二，如何揀中個題目，而家未好大，否則要同好多人爭，但幾年之內會變好大，否則做不到風投級的規模。大家都知，這兩樣欠缺任何一樣，都好難去到頂尖位置。
逐樣講。第一點，勁人團隊，必要是團隊，因為無論你自己幾好打，做到某個規模，一定靠團隊力量，因此關鍵是，點解會有勁人同你一齊做？不容易答。無方程式，無雞精課程惡補，成功砌隊的創辦人，林林總總，有些是某方面專才，有些卻樣樣都不精，有些交際一流，有些卻內斂寡言。如果簡單稱之為個人魅力，則有答等於無答。
第二點，揀題目。起碼有幾種可能性，一，根本無市場，現在無，幾年內都無。二，有市場，現在細，幾年內都細，再遠都是細。三，有市場，現在細，幾年內都細，再遲一些先爆。四，有市場，現在細，幾年內爆大。第一類，血本無歸，第二類，可以轉型為中小企。第三類，好唔抵。第四類，是中牛眼了。
吸引勁人和找對題目，兩樣都不是純粹投術，肯定也有運氣成份。兩樣各自都難，要兩樣一齊擁有，簡直是完美風暴的難度，所以startup做到大成的比例，是令人落淚的低。但其實兩者也不是全無牽連，當中的一條絲，是好多時，開得大的題目，是比較有挑戰性的題目，而勁人往往被挑戰吸引。於是乎，揀題目不老是捨難取易，可能是做到頂級startup的一個重要因素。Elon Musk下下不是整電動跑車就是要射火箭上太空，是有原因的。
宋漢生